ਮਨੀਲਾ (ਯੂ.ਐਨ.ਆਈ.): ਫਿਲੀਪੀਨਜ਼ ਦੇ ਦੱਖਣੀ ਸੂਬੇ ਮੈਗੁਇਡਾਨਾਓ ਡੇਲ ਸੁਰ ਵਿਚ ਐਤਵਾਰ ਨੂੰ ਘਾਤ ਲਗਾ ਕੇ ਕੀਤੇ ਗਏ ਇਕ ਹਮਲੇ ਵਿਚ ਚਾਰ ਸੈਨਿਕ ਮਾਰੇ ਗਏ। ਫੌਜ ਨੇ ਇਹ ਜਾਣਕਾਰੀ ਦਿੱਤੀ। ਫਿਲੀਪੀਨ ਫੌਜ ਦੀ 6ਵੀਂ ਇਨਫੈਂਟਰੀ ਡਿਵੀਜ਼ਨ ਦੇ ਬੁਲਾਰੇ ਲੈਫਟੀਨੈਂਟ ਕਰਨਲ ਡੇਨਿਸ ਅਲਮੋਰਾਟੋ ਨੇ ਦੱਸਿਆ ਕਿ ਦਾਟੂ ਹੋਫਰ ਅਮਪਾਟੂਆਨ ਕਸਬੇ ‘ਚ ਅੱਜ ਸਥਾਨਕ ਸਮੇਂ ਅਨੁਸਾਰ ਸਵੇਰੇ 10 ਵਜੇ ਦੇ ਕਰੀਬ 10 ਅੱਤਵਾਦੀਆਂ ਨੇ ਭੋਜਨ ਅਤੇ ਹੋਰ ਸਮਾਨ ਖਰੀਦਣ ਲਈ ਸੈਨਿਕਾਂ ਦੁਆਰਾ ਵਰਤੇ ਜਾਂਦੇ ਸਿਵਲੀਅਨ ਵਾਹਨ ‘ਤੇ M16 ਅਤੇ M14 ਰਾਈਫਲਾਂ ਨਾਲ ਗੋਲੀਬਾਰੀ ਕੀਤੀ।
ਉਸ ਨੇ ਕਿਹਾ ਕਿ ਸੈਨਿਕ ਸਪਲਾਈ ਖਰੀਦਣ ਤੋਂ ਬਾਅਦ ਆਪਣੇ ਗਸ਼ਤੀ ਅੱਡੇ ਵੱਲ ਪਰਤ ਰਹੇ ਸਨ, ਜਦੋਂ ਉਨ੍ਹਾਂ ‘ਤੇ ਰਿਹਾਇਸ਼ੀ ਖੇਤਰ ਨੇੜੇ ਹਮਲਾ ਕੀਤਾ ਗਿਆ। ਬੁਲਾਰੇ ਨੇ ਦੱਸਿਆ ਕਿ ਹਮਲੇ ਦੌਰਾਨ ਫੌਜੀ ਵਰਦੀ ਵਿੱਚ ਨਹੀਂ ਸਨ ਅਤੇ ਆਮ ਨਾਗਰਿਕ ਗੱਡੀ ਵਿੱਚ ਸਫ਼ਰ ਕਰ ਰਹੇ ਸਨ। ਹਮਲੇ ‘ਚ ਜ਼ਖਮੀ ਹੋਏ ਜਵਾਨਾਂ ਨੂੰ ਸਥਾਨਕ ਹਸਪਤਾਲ ‘ਚ ਦਾਖਲ ਕਰਵਾਇਆ ਗਿਆ, ਜਿੱਥੇ ਇਲਾਜ ਦੌਰਾਨ ਸਾਰਿਆਂ ਦੀ ਮੌਤ ਹੋ ਗਈ। ਉਨ੍ਹਾਂ ਨੇ ਹਮਲੇ ਲਈ ਦਾਉਲਾ ਇਸਲਾਮੀਆ (ਡੀਆਈ) ਹਥਿਆਰਬੰਦ ਸਮੂਹ ਨੂੰ ਜ਼ਿੰਮੇਵਾਰ ਠਹਿਰਾਇਆ। ਗੌਰਤਲਬ ਹੈ ਕਿ ਮਿੰਡਾਨਾਓ ਵਿੱਚ ਹੋਏ ਕਈ ਹਮਲਿਆਂ ਪਿੱਛੇ ਡੀਆਈ ਦਾ ਹੱਥ ਹੈ, ਜਿਨ੍ਹਾਂ ਵਿਚ ਪਿਛਲੇ ਸਾਲ ਦਸੰਬਰ ਵਿੱਚ ਲਾਨਾਓ ਡੇਲ ਸੁਰ ਸੂਬੇ ਦੇ ਮਾਰਾਵੀ ਸ਼ਹਿਰ ਵਿੱਚ ਮਿੰਡਾਨਾਓ ਸਟੇਟ ਯੂਨੀਵਰਸਿਟੀ ਵਿੱਚ ਬੰਬਾਰੀ ਸ਼ਾਮਲ ਹੈ। ਇਸ ਵਿਚ ਚਾਰ ਲੋਕਾਂ ਦੀ ਮੌਤ ਹੋ ਗਈ ਅਤੇ 50 ਹੋਰ ਜ਼ਖਮੀ ਹੋ ਗਏ।
